AJALI YA BASI NA LORI YARIPOTIWA ENEO LA TINDE MKOANI SHINYANGA

 

TINDE, SHINYANGA | JANUARI 27, 2026

AJALI ya barabarani imeripotiwa kutokea asubuhi ya leo Januari 27, 2026, majira ya saa 12:00 asubuhi katika eneo la Mnadani, Kata ya Tinde, Halmashauri ya Wilaya ya Shinyanga mkoani Shinyanga.

AJALI hiyo imehusisha basi la abiria la Kampuni ya KISILE lenye namba za usajili T 229 EEL, lililokuwa likisafiri kutoka Kahama kuelekea Mwanza, kugongana uso kwa uso na lori la mizigo lililokuwa limebeba shehena ya mchele kutoka Dar es Salaam kuelekea Rwanda.

Kwa mujibu wa taarifa za awali kutoka eneo la tukio, ajali hiyo imesababisha taharuki kwa wakazi wa eneo hilo pamoja na abiria waliokuwapo, huku jitihada za uokoaji zikiendelea kufanyika kwa ushirikiano kati ya wananchi, vyombo vya usalama na huduma za dharura.

VYOMBO vya usalama vimefika eneo la tukio na kuanza mara moja taratibu za uchunguzi ili kubaini chanzo cha ajali hiyo, sambamba na kuratibu usalama wa barabara hiyo inayotumiwa sana na magari ya abiria na mizigo.

HADI sasa, taarifa kamili kuhusu hali ya abiria na madereva bado zinaendelea kukusanywa, na mamlaka husika zimeahidi kutoa taarifa zaidi pindi uchunguzi wa awali utakapokamilika.

SERIKALI imeendelea kutoa wito kwa madereva wote kuzingatia sheria za usalama barabarani, ikiwemo kuendesha kwa tahadhari, kuepuka mwendo kasi na kuhakikisha magari yako katika hali salama ili kuendelea kulinda maisha ya watumiaji wa barabara.

TUTAENDELEA KUWAFIKISHIA TAARIFA ZAIDI KADRI ZINAVYOPATIKANA.